Hvar eru dætur Hjördísar Svan?

Ég hef nú í rúma 4. mánuði kynnt mér mál lítilla stúlkna sem fluttar voru með lögregluvaldi úr landi. Og því betur sem ég kynni mér málið skil ég minna og minna í því hvernig svona nokkuð getur viðgengist. Fyrir liggja (og ég hef lesið þessar skýrslur) vottorð um andlegt og líkamlegt ofbeldi, ítarlegar skýrslur barnasálfræðinga sem styðja grun um ofbeldi og gefa ítarlega til kynna vilja barnanna um hvar þær vilja búa. Ég hef í tvígang séð myndir af áverkum á börnunum. Og ekkert er gert, jú, auðvitað, meintum ofbeldismanni hefur verið dæmt fullt forræði. Reyndar er málið í áfrýjun en á meðan hafa foreldrarnir sameiginlegt forræði. En móðirin fær ekki að hitta börnin?? Fékk að hitta þær í flugumynd í skóla og leikskóla en faðirinn tók fyrir það og kemst upp með það. Það er ljóst (fyrir hvern þann sem vill kanna það) að barnaverndurnarmál í Danmörku eru í miklum ólestri. Þar er dönsku foreldri nánast alltaf dæmt forræði og skiptir ekki máli um hæfi. Mörgum Dönum er sjálfum farið að ofbjóða og krefjast þeir úrbóta með hag barna í huga. Hér í Noregi er verið að taka til í þessum málum eftir voveilegan dauða þriggja barna innan veggja heimilanna. Og hér er stranglega bannað að sækja börn með lögregluvaldi.
Ég hef skrifað til þriggja ráðherra, Ögmundar, Össurar og Guðbjarts og beðið um að ég fái hjálp við að reyna að hjálpa stelpunum. Enginn þeirra hefur svarað. Í minni sveit þótti það sjálfsögð kurteisi að svara fólki. Erum greinilega ekki úr sömu sveit. Ég hitti Guðbjart Hannesson í júlí, rétt eftir að stelpurnar voru fluttar úr landi með aðstoð yfirvalda og lögreglu. Ég vil gjarna segja frá nokkrum atriðum sem fram komu á þeim fundi. Ráðherra taldi að faðirinn væri etv. hæfari þar sem hann hefði meiri menntun. Ha, eru ofbeldismenn bara ómenntaðir menn? Hann virtist ekki vita að til væri heimilisofbeldi. Já, sjálfur velferðarráðherrann? Hann sagðist ekki ætla að hætta sinni stöðu fyrir „þessi börn“. Ja svei. Hann spurði afhverju ég færi ekki til Danmerkur og hjálpaði þessum börnum. Ég hef sennilega ekki skilið að þetta var kaldæðni, það sem mér finnst háalvarlegt að börn séu jafnvel í höndum ofbeldismanns. Nú vil ég beina þeirri spurningu til allra þeirra sem komu að þessu máli/mannréttindabroti á þessum börnum. Þessa þrjá herramenn, Braga, forstjóra Barnastofu, sýslumenn í Kópavogi og Höfn, Barnavernd Kópavogs. (Kannski er einhver úr minni sveit)
Ef rökstuddur grunur leikur á að barn/börn séu beitt andlegu/líkamlegu/kynferðislegu ofbeldi, er ekki skylda ykkar að rannsaka gaumgæfilega hvort svo sé og þá aðstoða þau börn sem við slíkt búa að komast í öruggt umhverfi? Og eiga börn ekki að njóta vafans? Svör óskast.
Að lokum (í bili) Fólk hefur komið að máli við mig og spurt mig afhverju ég sé að skipta mér af forræðisdeilu. Og með réttu, ég er ekki að því. En ég skipti mér af því ef ég tel að lítil börn eigi bágt og séu beitt ofbeldi. Ég er ekki að hugsa um rétt foreldranna heldur barnanna. Og því hef ég gert mál dætra Hjördísar að mínu. Hvar eru stelpurnar? Faðirinn hefur nú víst flutt í aðra kommúnu í Danmörku með þær sem ekki er óalgengt hjá þeim sem hafa eitthvað að fela.
Við yfirlestur dómsins sem felur þessum manni yfirráð yfir börnunum er ekki annað að sjá en að hann falli á þann veg vegna:
1. Íslensk stjórnvöld sendu börnin til Danmerkur
2. Faðirinn heldur fram að aðeins ef hann fái forræðið muni börnin njóta beggja foreldra. Hann hefur nú haft börnin frá 1. júlí og gætir þess vandlega að börnin fái ekki að hitta móður sína.
3. Að móðirin hafi farið með börnin til Íslands og hann hafi ekki vitað hvar þær voru og þess vegna ekki haft samband við þær. Þessu er kannski hægt að halda fram í Danmörku, en allir sem þekkja til á Íslandi vita betur. Hann hafði búið á Höfn sjálfur og vissi að enginn vandi var að hafa upp á þeim ef áhugi var fyrir hendi.
4. Ofbeldi gagnvart börnunum var ekki kannað hvorki á Íslandi né Danmörku, þrátt fyrir skýrslur og myndir þar um.

Eru þetta viðunandi vinnubrögð?
Arndís Hauksdóttur
Sóknarprestur hjá Norsku kirkjunni


Barnavernd á Íslandi! Á villigötum?

Ég hafði lengi vel trú á kerfinu. Og hvað meina ég með kerfið? Jú, Ég trúði að yfirvöld og fagfólk sem vinnur við að gæta réttar fólks sem á í erfiðleikum ynni vel og faglega og hefði hag barna að leiðarljósi. Að réttur barna væri virtur. En um síðustu aldamót skall ég harkalega til jarðar. Ung frænka mín hafði verið svo ólánsöm að binda trúss sitt við illmenni. Hún átti með honum börn. Svo loksins, eftir margra ára ofbeldi gegn henni og börnunum herti hún upp hugann og flúði frá manninum með börnin. Hún taldi að hún yrði örugg í Kvennaathvarfinu meðan hún væri að greiða úr sínum málum. Var hún það? Nei, Barnastofa og lögmaður mannsins sameinuðust í því að sækja litlu börnin þangað og afhenda ofbeldismanninum. Afhverju? Jú, það var réttur hans. Um rétt barnanna var ekki hirt. Engu máli skipti að þó nýbúið væri að fella tugi dýra sem voru í umjá mannsins vegna illrar meðferðar. Kærur höfðu dunið á honum árum saman vegna dýramishöndlunar. Barnastofa taldi samt einsýnt að hann væri góður faðir. Engu máli skipti þó mikið af vitnisburðum um ofbeldi hans hefði verið lagt fram. Rétturinn var hans. Þegar hér var komið hófst baráttan við að ná börnunum burt frá ofbeldismanninum. Alls staðar var komið að lokuðum dyrum. Bragi, forstjóri Barnastofu, þekkti manninn og viðurkenndi fyrir mér (tveggja manna tal) að hann væri vissulega ekki neitt góðmenni. En, hann gat bara ekkert gert. Einu sinn fór ég með mömmunni til að afhenda börnin til mannsins. Úr umgengni frá henni. Það er nokkuð sem ég gleymi ekki. Eldra barnið skreið aftur í skott og faldi sig undir fatahrúgu. Yngra barnið sat stjörf, náföl og ísköld viðkomu. Svo voru þau leidd til hans eins lömb til slátrunar. Í dag myndi ég aldrei taka þátt í svona afhendingu. Hefði frekar flúið með þau úr landi. Vegna þess að við eigum að vernda börnin okkar, frá slæmri meðhöndlun. Og öll börn eru okkar börn. Afhverju tók ég svo þátt í þessum gjörningi? Kannski vegna þess að einhver hluti af mér trúði enn að börnin yrðu vernduð. Að það væri verið að vinna í því. Börnin fengu um síðir, eftir harða baráttu að flytja heim til sinnar góðu mömmu. En það var ekki kerfið sem gerði það. Það vorum við, ættingjar þeirra sem hjálpuðum þeim. Sem betur fer.

Núna 12 árum seinna hefur ekkert breyst. Þrjár litlar stúlkur eru rifnar úr faðmi móður sinnar af sérsveit lögreglunnar. Með hjálp Barnastofu. Með sama forstjóra. Ekki dugði minna en sjö lögreglubílar með fullfermi lögreglumanna til að taka þær með valdi og færa föður þeirra sem hefur sannanlega beitt móður þeirra, bróður og þær ofbeldi. Og afhverju segi ég sannanlega. Ég var vissulega ekki á staðnum. En ég hef séð, með eigin augum skýrslur frá lækni í Danmörku þar sem hann lýsir vaxandi ofbeldi föðurins gegn elstu stúlkunni. Lýsir áhyggjum sínum yfir því að ofbeldið verði sífellt grófara. Lýsir áhyggjum sínum yfir andlegu ástandi barnanna. Og biður um að hann fái að fylgjast með framvindu mála. Og ég hef séð myndir af áverkum á barninu. Eitt veit ég um vinnu lækna eftir að hafa starfað við hlið þeirra mest af minni starfsævi að þeir láta ekki fara frá sér svona skýrslur nema þeir séu vissir í sinni sök. Annars geta þeir lent í slæmum málum.
Einnig hef ég lesið ítarlegar skýrslur tveggja barnasálfræðinga þar sem í ljós kemur að allar stúlkurnar hafa mjög góð og jákvæð tengsl við móður og óska þess um fram allt að fá að vera hjá henni. Aftur á móti eru öll tengsl við föður neikvæð og þær eru hræddar við hann. Vilja ekki vera hjá honum. Nú gæti einhver talið að möguleiki væri á að móðirin gæti hafa lagt þeim orð í munn. En aðferðir þær sem notaðar eru við rannsókn á vilja og tilfinningum barna koma í veg fyrir að það sé hægt.Það er að segja sé þær unnar af vandvirkni og góður tími gefinn til þess. Þessar skýrslur voru vel unnar og nægur tími tekinn til þeirra. Síðan kom þriðji sálfræðingurinn og talaði við þær í 20. mínútur og komst hann að annari niðurstöðu. Tuttugu mínútur! Hvílík vinnubrögð. En á hans framburði var tekið meira mark á. Afhverju? Það er spurning sem ég get ekki svarað.
Afhverju var ekki tekin af þeim skýrsla í Barnahúsi? Skrautfjöður Braga forstjóra. Sem hann ferðaðist alla leið til Jórdaníu hér um árið til að kynna sem feikilega góðan kost er gæta ætti hagsmuna og réttinda barna. Jú, vegna þess að faðirinn vildi það ekki. Skrítið, svona góður faðir að áliti stjórnvalda og Braga. Aftur var réttur barnanna hafður að engu. Bróðir stúlknanna hefur sagt frá miklu og grófu ofbeldi gegn sér. Er hlustað á hann? Nei.
Eftir að stúlkurnar voru rifnar af móður sinni af sérsveitinni eins og gert er við hættulega glæpamenn voru þær settar í fóstur til ókunnugra í tvo sólarhringa. Er hægt að ímynda sér hvað hefur hrærst í sálum lítilla barna sem svona er komið fram við? Faðirinn kom ekki til að taka þær fyrr en þá. Og fékk hjálp stjórnvalda til að fara með þær úr landi. Án vegabréfa. Nú, má það? Stjúpfaðir var nokkrum dögum seinna kyrrsettur vegna þess að hann hafði ekki vegabréf fyrir stjúpbörn sín. Þó hann væri að ferðast með þau með samþykki móður þeirra og þeirra sjálfra.
Móðir stúlknanna hefur forræði yfir þeim ásamt manninum. En hún veit ekki hvar þær eru, hún veit ekki hvernig þeim líður og enginn er að fylgjast með þeim. Náðasamlegast hefur faðirinn â€Å¾leyft“ henni að tala við stúlkurnar nokkrum sinnum á netinu. En hann situr yfir þeim og hún fær ekki að sjá þær í mynd. Hún hefur greinilega engan rétt. Hvorki hún né börnin.
Og hvernig eru svo vinnubrögð yfirvalda. Ég ætla ekki að tjá mig um sýslumanninn á Höfn. Það verða aðrir að gera. En velferðarráðherra, yfirmaður barnaverndarmála á Íslandi. Hann brást. Og hann getur ekkert gert, segir hann. Hann hefur lokið aðkomu sinni að málinu. Lögin segja að stúlkurnar eigi að vera hjá föður, segir hann. Hann ætlar ekki að hætta sinni stöðu fyrir þessi börn. (hans eigin orð). Hvaða lög eru það sem segja að börn eigi að vera í höndum ofbeldismanns? Ef þau eru til þarf að breyta þeim hið snarasta.
En til eru önnur lög sem segja:
Í 28. grein. Barnaverndarlaga:
Forsjá barns felur í sér skyldur foreldra til að vernda barn sitt gegn andlegu og líkamlegu ofbeldi og annarri vanvirðandi háttsemi.
Þessum lögum var móðirin að framfylgja eins og henni bar.

Lítum svo á aðra leikara í þessum farsa. Utanríkisráðherra hefur fengið fjölda beiðna frá aðstandendum stúlknanna og þau hafa beðið um hjálp. Hver eru svo svör hans: Engin. Hefur aldrei svarað. Sennilega önnum kafin við að gæta réttinda erlendra mann og kvenna. Sem er gott. En ekki er gott ad gleyma Ìslendingum alveg. En kannski er hann bara sofandi.
Barnavernd Kópavogs þarf einnig að athuga sinn gang. Þar var lofað að börnin yrðu ekki tekin ef þeim væri það erfitt. Stúlkurnar héldu sér í dyrastafi til að reyna að sleppa eftir að þær voru rifnar úr faðmi móður sinnar meðan stór og stæðilegur lögreglumaður hélt henni niðri. Og hvar var fulltrúi barnaverndar Kópavogs þá? Hann mætti ekki á staðinn.
Það er hrollvekjandi að verða enn og aftur vitni að svona hræðilegum vinnubrögðum barnaverndaryfirvalda og stjórnvalda. Og að hluta til er þetta sama fólkið. Forstjóri Barnastofu og núverandi félagsmálastjóri Kópavogsbæjar (sem er yfirmaður barnaverndar þar) eru enn og aftur að brjóta á réttindum barna.
Er þetta ásættanlegt? Ætlum við Íslandingar að líða svona hrottaskap gangvart þrem litlum stúlkum? Litlum Íslenskum ríkisborgurum. Eða ætlum við að krefjast þess að þessi mistök verði leiðrétt og réttur og óskir barnanna til búsetu verði virtur?
Í Barnasáttmála SÞ stendur: (Sem Íslendingar undirrituðu árið 1992).
12. grein
Aðildarríki skulu tryggja barni sem myndað getur frjálslega eigin skoðanir rétt til að láta þær í ljós í öllum málum sem það varða og skal tekið réttmætt tillit til skoðana þess í samræmi við aldur þess og þroska.

19. grein
Aðildarríki skulu gera allar viðeigandi ráðstafanir á sviði löggjafar, stjórnsýslu, félags og menntunarmála til að vernda barn gegn hvers kyns líkamlegu og andlegu ofbeldi, meiðingum, misnotkun, vanrækslu, skeytingarleysi, illri meðferð eða notkun, þar á meðal kynferðislegri misnotkun, meðan það er í umsjá annars eða beggja foreldra.

Eru þetta bara fögur orð eða hvað? Hvorug þessara greina var virt eða farið eftir í máli þessara litlu stúlkna.
Að síðustu (í bili). Það eina sem mér er umhugað um að vilji og réttur barnanna sé virtur og farið eftir því. Satt að segja gef ég miklu minna fyrir rétt foreldranna. Börn eru ekki hlutir eða eign þeirra heldur sjálfstæðir einstaklingar með sinn vilja og langanir. En það er okkar allra stuðla að og leyfa þeim að njóta sín og alast upp við gott atlæti. Börnin eru það dýrmætasta í öllum þjóðfélögum. Og þau eru börn okkar allra.

Arndís Hauksdóttir.hjukrunarfr og nu sóknarprestur hjá Norsku kirkjunni.


Afskriftir vegna Jóns Ásgeirs og félaga.. rétt að byrja.

Nú á að afskrifa 23 milljarða vegna þessara kumpána. Og þetta er bara byrjunin á því sem við eigum eftir að tapa á þessum mönnum. Hvað skyldi Jón Ásgeir vera búinn að koma miklum peningum undan. Ég skora á fólk að hætta að versla í búðunum hans og þannig svelta svínið burt...

Nýtt Ísland, held að það sé engin von um það. Nema Ögmundur

Sá í fréttum að litli bjöggabófinn er að fara setja upp fyrirtæki í fyrrum herstöð í Keflavík. Og viti menn, ríkisstjórnin ætlar í viðskipti við hann. Það á sem sagt að halda áfram að leyfa honum að svindla og svína á þessu landi.

Og hver var svo næsta bófafrétt? Jú, að Pálmi í Fons sem keypti af sjálfum sér og seldi sér flugfélag nokkrum sinnum fær að halda því. Svei svei.

Eini ráðherrann sem ekki hefur snúist 180 gráður við að komast í ríkisstjórn er genginn úr henni.

Ekki mikil von fyrir þetta land.


Þrír litlir munaðarleysingjar á Íslandi í dag. Er einhver aflögufær???

Á morgun verður borin til grafar ung falleg þriggja barna móðir. Börnin  munaðarlaus því faðir þeirra er einnig látinn fyrir nokkru. Elsta barnið, 22 ára stúlka reynir nú af alefli að halda litlu fjölskyldunni saman. Litlu bræður hennar eru 7 og 2. ára. Þau búa í örlítilli íbúð í Hafnarfirði á vegum bæjarins. Bjakhjarl þeirra er mjög veikur. Öll þið sem eigið afgang, veitið þeim aðstoð. og munið að margt smáll gerið eitt stórt.  Bankanr. 140 - 25 70155.   kl. 1602872259

Hreiðar Már segir...bla bla bla

Alveg er það merkilegt þegar fjölmiðlar eru að vitna í þessa angurgapa og þar að auki á forsíðu. Er þetta í alvöru eða er verið að gera grín að þeim? (smb. fréttablaðið í dag).

Ég bara þoli ekki þegar þessir gangsterar eru að koma fram með einhvern stórasannleik um sviðna jörð hér eftir þá sjálfa. Sjá þeir ekki nokkurn skapaðan hlut hvað þeir eru búnir að gera af sér?

Meira að segja þó að þeir álpist til að tjá sig um eitthvað sem maður/kona er jafnvel sammála fer maður/kona að efast um réttmæti þess af því að þessir aular sem eru búnir að kollsteypa hér öllu til helvítis eru að tjá sig um málefnið.

Ef þeir sjá ekki sóma sinn í að halda sér til hlés, (sóma????) þá fer ég fram á að fjölmiðlafólk sé ekki að vitna í þá.

Það er eins og rauð dula framan í fólk!!!!!!!!

Þetta er nóg til þess að ég verð reið í allan dag.


Er Steingrímur J. að segja frá því sem koma skal? Afsakið, og allt skal verða gleymt

Er það afsökunarbeiðni sem þjóðin bíður eftir frá glæpamönnunum sem komu okkur á hausinn? Ó nei, Steingrímur. Er hann með þessu að segja að þeir verði ekki ákærðir og dæmdir. Bara biðja afsökunar og svo er allt gott. Ég vil ekki sjá afsökunrbeiðni frá þessum mönnum. Ég vil frystingu á peningunum sem þeir stálu. Og ég vil sjá þá í fangelsi. Og síðast en ekki síst, ég vil að hætt verði að frysta og fella niður skuldir þeirra. Samanber skuldir Jóns "glæpamanns" Ásgeirs. Og ég vil að hætt verði að moka milljörðum inn í fyrirtæki sem þeir eru búnir að tæma. Samanber Sjóvá. Þetta er ekki þolandi lengur.

Aumimgja Sigmundur. Sveltur hann kannski?

Það er slæmt að það skuli vera lokað hjá hjálparstofnunum. Hvert leitar aumingja Sigmundur með sín  33. þúsund á mánuði. Hann hefur meira að segja minna en strípaðir öryrkjar og ellilífeyrisþegar sem lifa ekki heldur skrimta. Reyndar lítur hann ekki út fyrir að svelta, með undirhöku og alles.

Í alvöru talað eru menn sem ekki borga til samfélagsins ekki kallaðir sníkjudýr???


Næsta síða »

Um bloggið

Arndís Ósk Hauksdóttir

Höfundur

Arndís Ósk Hauksdóttir
Arndís Ósk Hauksdóttir
Ég er tveggja barna móðir, amma og prestur sem er annt um íslenskt samfélag. Rèttindi barna og dyra eru mèr hugleikin

Bloggvinir

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (29.3.): 0
  • Sl. sólarhring: 1
  • Sl. viku: 1
  • Frá upphafi: 0

Annað

  • Innlit í dag: 0
  • Innlit sl. viku: 1
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband